لا يمين ولا شمال...في النص

كتبت: شيماء زاهر

لفترة قريبة جدا ما كنش حابه اتكلم في الموضوع ده خالص، لأني عارفة إنه من الموضوعات إللي بنتعامل معاها بحساسية شديدة وكنت خايفة أكتب كلام يضايق حد، لولا إن الموضوع كل يوم بحسه موجود ع السطح وحتى لو فضلت أكبر دماغي مش حيمحيه ولا حيلغي وجودةالموضوع هو الطريقة المتطرفة في تناول الحجاب؛ لو كان حد قرأ مقال سارة سند في المصري اليوم حيعرف إن أي بنت مش محجبة ، عليها ضغوط فظيعة إنها تلبسه، مقتنعة بقى مش مقتنعة المهم إنها في نظر الناس لازم تلبسه وخلاص .

والضعوط دي بتبتدي م أول الملصقات إللي موجودة في كل حتة حواليك وبتاخد شكل الإعلانات..الحجاب قبل الحساب..ألا ترتدين زي العفاف.. لحد حاجات غريبة فعلا بتحصل كأنك تبقى رايح تركب العربية بتاعتك في أمان الله وتلاقي ع المساحات كتيب صغير، تيجي تفتحه وتقراه تلاقيه دعوة للنقاب، أو واحدة ما تعرفكش أوي تلاقيها تيجي لوحدها وتفتح معاك موضوع الحجاب أو واحد تانية ما تعرفكش برضوا وتفتح معاك الموضوع ولو قلتها ده موضوع شخصي ومش عايزة اتكلم فيه تحاصرك بالأسئلة: يعني هو فرض ولا مش فرض؟ ولو قلتلها إني الحقيقية مش عايزة ادخل في نقاش م النوع ده، تمشي وهي متحفزة وكأنه حتى مش من حقي اختار اتكلم في إيه و ما اتكلمش في إيه!ع الناحية التانية الموضوع غريب برضوا، اتهام ضمني إن كل واحدة محجبة حاطه حجاب ع عقلها، و إساءه للمحجبات برضوا حتى من ضمن بعض الناس إللي مؤمنين به، واستظراف... كأنك تلاقي واحد يتريق ع إيشارب واحدة لابساه ، مالك لابسة إيشارب عامل زي الشاش؟ ودي حكاية قالت هالي واحدة كنت بدرّس لها وإن المدير أحيانا يعلق ع لبس الموظفات ومن ضمنها الإيشارب. والحقيقة هنا أنا مش محتاجة أوضح إني ما أقصدش أي إساءه من ذكر المثل ده ببساطة لأن أمي محجبة وما حبش حد ولا يعلق ع الإيشارب بتاعها ولا يقول عليها رجعية لانها مش كده وهي نفسها لما بحكى لها الحكايات دي تقول لي : بصي اعملي الحاجة إللي أنت مقتنعة بها.ما تخليش حد يجبرك ع حاجة. ع أيامنا ما كنش فيه حجاب ...أهم حاجة اللبس يكون حشمة.وبعيدا عن إن ده رأي والدتي الشخصي ورأيي برضوا إللي هو ولا ملزم لحد ولا دعوة لأي حاجة ، لو حطيت الأمثلة إللي ذكرتها فوق قدام بعض، حتحس إن كلا الفريقين وجهين لنفس العملة ونظرة للمرأة إنها مش عارفة بتعمل إيه ومحتاج دايما يتقال لها تعمل إيه: أقلعي الحجاب ...ألبسي الحجاب...وهنا بسأل نفسي: هو ما ينفعش كل واحد يحترم التاني؟ الموضوع صعب؟ وبعدين أنا برضوا مش عارفة، فين طيب المواضيع التانية إللي الإسلام دعا إليها ...ليه ما فيش ملصقات بتدعو الناس للصدق، أو مقاومة الظلم، الجهر بالحق ، اتقان العمل، هو كل ده مش م الإسلام؟الحاجة الأخيرة إللي حابه أقولها إني مش ضد الجدل الفقهي الدائر حوالين الحجاب ، لأن في الإسلام أمثلة كثيرة جدا على حرية الفكر، إللي كانت بتتم بشكل راقي، إن الحجة أمام الحجة ، ولأني مؤمنة إن الواحد لما يعمل الحاجة عن إيمان حقيقي وعن بحث بيعملها وهو مخلص لها من غير ما يكون فيه نفاق.